Heb 1 | DAD | STEP | Kulu Negur, profet bunem, sain musei ado naab fire fire bun, tubuda tar wogõ fiyẽdin,

Hebrews 1

Negur Naal Engel Wal Fedif

1 Kulu Negur, profet bunem, sain musei ado naab fire fire bun, tubuda tar wogõ fiyẽdin, 2 anĩ ere, gama idikeleya naa enidi bun, ĩ Naal bunem wogõ fadan, Naal ĩ ereb ereb ganan akorouf nigin Negurem igirnen, ĩ bunem saa teneub ado inon. 3 Naal ĩ Negur nẽ fula fiya medeĩya nẽ so fiya, ĩ Negur yogo gen bagai, in od totol ado bunem ereb ereb ganan megeir irou ifaref. Ĩ mosor lilik fiya anĩ age fel fen, saa ilun Negur Megeir Bagai ima biyalẽ ibodon. 4 Negur, Naal yana ifenen are engel yeneid wal fiya, age fiya bagai, Naal ĩ engel wal fediya.

5 Ere nigin, Negur ĩ yogon engel taka to eig ye irokenen,

“Õ neu Kesu,
gama aya õ Tamã wõ aul.” ^{▼▼1:5aSam 2:7}
Takag, Negur ĩ engel taka nigin to eig ye iron,

“Aya yogon Tama abodõf,
ĩ neu Kesu ibodõf.” ^{▼▼1:5b2 Samuel 7:14, 1 Stori 17:13}
6 Takag, Negur ĩ yogon kesu matu tenebur ein irou isif sain bun, ĩ baban irok,

“Negur nẽ engel ganan ĩ seli dalouf.” ^{▼▼1:6Diuteronomi 32:43}
7 Negur ĩ engel nigin irok,

“Ĩ yogon engel yau gen wowã douf nigin inodif,
ĩ yogon kabĩ tamo yã bale gen wowã douf nigin inodif.” ^{▼▼1:7Sam 104:4}
8 Anĩ ere, Negur ĩ Naal nigin irok,

“O Negur, ogon tano gai gai ibodkalauf,
õ ogon tano tobonunã madur bagai bun lo wouf.
9 Õ tobonunã madur bagai nigin waũ laaf fen, tobonunã sane anĩ sese wedig,
anĩ nigin, Negur, ogon Negur kulĩya nẽ moul õ bun fi felen,
anĩ bunem, nẽ tã tar wal feid fen, ilun inenon.” ^{▼▼1:9Sam 45:6, 7}
10 Takag, ĩ irok,

“O Odug, gariya bun õ teneub nẽ gariya kare won,
õ imam saa unon.
11 Idi fau inanakalauf, anĩ ere, õ fau ubodõf,
idi ganan kolos gen sanef ilauf.
12 Õ idi saket gen kori wediyouf,
idi kolos gen falei wediyouf.
Anĩ ere, õ ubodok gen ago ubodõf,
ogon sain to idikalauf.” ^{▼▼1:12Sam 102:25-27}
13 Negur ĩ yogon engel taka to eig ye irokenen,

“Imau biyalẽ ubod mog,
ogon kiwai tar
õ yẽ inoya nẽ sawa anouf.” ^{▼▼1:13Sam 110:1}
14 Age fiyauf are, engel idi ere? Idi uur Negur nẽ kabĩ daledig, tamo kayau isennẽya dalouf anidi disennẽdiyouf nigin Negurem idi sur fedidig.